النتيجة


أظن مفيش أهل الا بيتمنوا يشوفوا أبنائهم متفوقين؛ ويوم النتيجة من الاوائل🥰
عشان يفرحوا بالدرجات النهائية .. ويحتفلوا ويغنوا .. ويبلغوا القريب والبعيد وهم فخورين بتقديرات أبنائهم🤹🥳🥳

ده اللى اتعودنا عليه كلنا .. ده الغالب والقاعدة العامة .. صح؟ 🤔
هو صح طبعا .. لكن لا ننكر كمان أن لكل قاعدة شواذ !!🙄

جاءتنى أم .. يبدو عليها الفرحة؛ سألتها عن السبب

قالت: نتيجة بنتى ظهرت

باركت لها وسألتها عن المجموع الكلى والتقدير

قالت: بصراحه المجموع غير ما كنا متوقعين؛ الحمد لله؛ إن شاء الله تعوضه التيرم التانى

سألتها بتعجب: طب يعنى انتى مش زعلانه .. مش حزينة

قالت: اكيد زعلانه طبعا؛ عشان بس فرحتى مش كامله؛ لكن فعلا مش حزينة؛ بالعكس خالص انا فرحتى من نوع مختلف شوية

لم اتكلم وتركتها تكمل🤐🤫

قالت: لما عرفنا النتيجة؛ بنتى قعدت تعيط وتقول حاسه انها اتظلمت فى الدرجات؛ أخدتها فى حضنى وأكدت عليها أنه مهما كانت درجاتها؛ فهى بنتى حبيبتى؛ وطلبت منها تهدى خالص؛ وسبتها تنام💚
قامت بعد كده من نفسها تتوضأ وتصلى .. صلت اليوم كله .. رغم انها كانت مش منتظمة فى الصلاة .. وبعدها فتحت المصحف وقعدت تقرأ .. رغم أنه مهجور من رمضان💔
 تانى يوم رتبت دولابها واتخلصت من حاجات كتير عديمة الفائدة؛ وقررت انها تقطع علاقتها بصديقات سيئين كانوا معها💪
شجعتها فى كل حاجة بتعملها .. واحتفلت بيها .. وقلت لها : الحمد لله انك جبتى المجموع ده😍 لأن لولاه ما كنتى اتغيرتى للأحسن كده👍

توقفت عن الكلام لثوانى .. ثم قالت:
يمكن لو كانت طلعت من الاوائل؛ ما كنتش قربت من ربها كده؛ ولا اتخلصت من الصحبة السيئة دى؛ كنا هنفرح ونغنى ونقول الحمد لله؛ هنقولها باللسان بس؛ لكن مش من قلوبنا.
   🍃🍃🍃🍃🍃🍃🍃🍃🍃🍃🍃🍃🍃

✨سبحان الله .. حقا فى كل محنة .. منحة✨
بس احنا دائما اللى بننتظر الحاجات تحصل زى ما احنا عاوزين وبس .. غير كده يبقى غم وهم

🌱الأم دى شافت الإيجابيات اللى حصلت من المحنة اللى مرت بيهم؛ وغضت الطرف عن السلبيات👏👏👏
 حست بكلمة الحمد لله من قلبها وفرحت بطريقة مختلفة؛ شافت السعادة بنظرة تانية وشجعت بنتها بكل حب💚

🌿غيروا نظرتكم للحياة
🌿وجددوا ثقتكم بربكم
🌿احسنوا الظن به
 🌿وتأكدوا ان كل محنة .. يتخللها منحة
🌼ولكنكم لا تعلمون🌼

#هنعيشها_بسعادة
#قطوف_حياتية
#أمانى_عادل
t.me/han3eshabs3ada

تعليقات

المشاركات الشائعة من هذه المدونة

أنحتفل بمولده ،، أمْ بوفاته!!

ما بين الحب والزواج التقليدى

قَدْ شَغَفَهَا حُبّاً