ماما .. احنا بنصوم ليه؟!

سألنى صغيرى قائلا:
🧒 =ماما .. هو احنا بنصوم ليه؟؟
🧕 -طاعة لله ؛ نأخذ عليها أجر كبير، ومغفرة للذنوب
فعاد متسائلا غاضبا: بس انتى قلتى قبل كده انى لسه صغير و مش عندى ذنوب، وكمان الصوم ده متعب جدا؛ بجد حرام .. ايه العذاب ده، أنا بكون عاوز أشرب عشان عطشان ونفسى أكل أيس كريم عشان الجو حر

هنا اخترت الصمت ولم أجب؛ فلابد من إجابة تجعله يحب الصوم؛ كيف اجعله يستشعر بقلبه تلك الطاعة؛ كيف اشرح له الحكمة من الصوم وانا شخصيا أكاد لا اعرف منه سوى أن الصوم مغفرة للذنوب؛ وبالفعل هو لا يزال صغيراً لا ذنوب له؛ أى لن يبالى بكلامى عن الثواب والأجر.

هل اقول له كما تعلمنا فى الصغر؛  أننا نصوم حتى نشعر بالفقراء؛ وبالتالى نعطف عليهم ونعطيهم؛ ولكن مهلا .. أذكر أننى قلت له هذا من قبل وكان رده مفاجئ، حيث قال:
إزاى يعنى نحس بالفقراء، ماهم كمان بيصوموا معانا، وكمان ده تعذيب، لأن الأكل مش حرام، ولا حتى المياه والأيس كريم !!

كلام مقنع حقا، وعليه فقد حان دورى أن أجد إجابة مقنعة، تجعله يعرف لماذا الصوم؛ سبب يقرب له المعنى والمغزى ويؤدى به لحُب تلك العبادة والإقبال عليها، بحثت وتفكرت وبتوفيق الله توصلت.

وبعد أن أصبحت أملك الإجابة، قررت أن أبدأ انا الجولة، وأبادره بالسؤال
🧕-حبيب ماما.. ممكن أسألك سؤال صغير؟
🧒=أتفضلى
🧕-ممكن تقول لى ايه أشهر المخلوقات فى الكون كله غير الأنسان؟
🧒=المخلوقات اللى على الأرض، حيوانات، ونباتات، وحشرات،واسماك، ومخلوقات فى السماء الملائكة والشياطين
🧕 -طب هل فيه تشابه بين الإنسان والمخلوقات التانية؟
=شرد بفكره قليلا ثم أجاب: أظن مفيش
🧕 -ايه رأيك الأول نعرف تركيب الإنسان، وبعدين نجاوب على السؤال
🧒 =ماشى
🧕- الانسان يتكون من جسد وقلب وعقل وروح، الجسد يحتاج إلى الأكل، والقلب للحب والمشاعر، والعقل للتمييز والتفكر والإدراك، الروح أو النفس للتعلق بالله، تفتكر هل فى مخلوقات تشبه الإنسان فى التركيب ده
🧒= أجاب مسرعا: أيوه طبعا، الحيوانات عندهم جسد وقلب، بس مفيش عندهم عقل
 🧕- صح.. وعشان كده الحيوانات مالهاش حساب فى الأخرة، يعنى مش هتدخل جنة ونار و....
  🧒 = قاطعنى قائلا: أيوه فعلا المستر فى حصة الدين قال كده، وكمان قال لو الإنسان عاش حياته يأكل وبس هيكون زى الحيوانات، لازم نفكر بالعقل
🧕- كلام سليم، بس تفتكر الحيوانات تقدر تمنع الأكل أو تعمل رجيم زى الإنسان، أو مثلا يكون قصادها أكل بتحبه وتسيبه
🧒=أجاب ضاحكا: لا طبعا، دول بياكلوا علطول أى حاجة، حتى لو مش نضيفة
🧕- تماااام، ده معناه ان الحيوان مفيش عنده ارادة، لكن الإنسان عنده، ويقدر يتحكم فى تصرفاته، ويقدر يمتنع عن الأكل حتى لو بيحبه، يعنى يقدر يصوم
عقد حاجبيه وأطبق شفتيه، ولم يرد، فاستطردت مسرعة قائلة:
ده بالنسبة للتشابه بين الإنسان والحيوان، طب تفتكر مافيش تشابه بين الإنسان والملائكة
🧒 =نظر لى متجهما، وقال: ازاى يا ماما، أًصلا الملائكة مخلوقين من النور، وعندهم أجنحة، وكمان مش بيعملوا أى معصية، يعنى مقيش اى تشابه
🧕- أظن نسيت تقول انهم مش بياكلوا كمان
🧒 =أيوة ... بس ... هو ..... أنتى تقصدى ايه
 🧕- أقصد أن الإنسان ممكن يكون شبه الملائكة لو قدر يمتنع عن الأكل شوية، وبنفس الوقت هيكون افضل من الحيوانات لإنه اتحكم فى نفسه وأظهر قوة الإرادة عنده وامتنع من حاجات بيحبها لوقت بسيط، يعنى يصوم

وهنا توقفت عن الكلام و تركته بمفرده وغادرت المكان، تركته يفكر فيما دار بيننا من كلام؛ لعله يراجع الحوار الذى كان بيننا ويجد فى ثناياه شيئا يشفى صدره، داعية الله أن يشرح صدره وينير بصيرته.
لم يمضى من الوقت الكثير حتى أتانى متبسما قائلا:
🧒= أنا حاسس كده ان كلامك ده كان عشان سؤالى احنا بنصوم ليه..صح؟
🧕- أومأت برأسى مبتسمة : أى نعم، واتمنى اعرف انت فهمت ايه
🧒= فهمت ان ربنا أمرنا بالصوم عشان نعيش شهر كامل زى الملائكة، ونتغلب على التشابه اللى بيننا وبين الحيوانات، ومفيش مانع اننا نمتنع عن أكل حاجات بنحبها كام ساعه بس، عشان وقت الفطار ساعة اذان المغرب لما نأكل ونشرب ، هنفرح اننا قدرنا نتحكم فى نفسنا وكان عندنا ارادة قوية طول اليوم، وقولت لا بكل قوة للايس كريم 💪
توقف عن الكلام فجأة، ثم سألنى : هو رمضان هيجى امتى بقى ، انا نفسى اختبر قوتى، عاوز أكون ملاك
🍃🌼🍃🌼🍃🌼🍃🌼🍃

بالتأمل  فى تركيب الانسان؛ سنكتشف أن كل منا يحمل بداخله جانب ملائكى وأخر حيوانى؛ أما الجانب الحيوانى يتمركز فى شهوتى البقاء والتكاثر؛ وكلما كان الإنسان تابعا لهواه وشهواته كان أقرب للحيوان؛ وأما الجانب الملائكى يتمركز فى تزكية القلب والروح، وكلما كانت الروح متعلقة بخالقها والنفس متجددة النية خالصة لله؛ والقلب سالما متوكلا على الله؛ كلما ارتقى الإنسان لمنزلة الملائكة؛ بينما العقل هو المميز لنا؛ هو المحور الذى يساعدنا فى اختيار أحد الجانبين ليكون له النصيب الأكبر من شخصيتنا.
اسمو بأنفسكم فى رمضان لتصلوا لدرجة الملائكة ولتخرجوا من رمضان أفضل مما دخلتموه، الصوم عبادة مختلفة لا عمل فيها، بل هو قائم على الترك؛ ترك المباح ابتغاء طاعة الله؛ ترك الطعام و الشرب امتثالا للأمر و طمعا فى الثواب؛  وترك المعاصى تزكيةً للنفس وتطهيراً لها.
كل عام وانتم الى الله أقرب💚
اللهم بلغنا رمضان