): إنقسام شعب :(

بيسألونى انتى مين .. سيسى ولا حمدين

ضحكت وقلت : مصرية .. و كلنا مصريين

طب يعنى  صوتك لمين .. سيسى ولا حمدين

قلت : ما حدش بيمثلنى ؟! .. بصراحة انا مقاطعين
~ ~ ~

قام واحد ثار وهاجمنى .. قال : انتى من الخاينين

وواحد تانى سخر منى .. وقال : إرهابيين

وثالث استهزاء بيا .. وقال : متخلفين

ورابع قال : سلبية .. وعقلية مجانين

وواحدة قررت تقاطعنى .. وقالت : همجيين

وواحدة ضحكت بسخرية .. وقالت خليكو متغاظين
وفى الأخر حكموا عليا ..  إنى من الإخوان المسلمين

كلهم كانوا ضدى .. ومنى كانوا قافشين
~ ~ ~

ضحكت تانى وقولت ... اسمعونى بس دقيقتين

دى مسرحية مش انتخابات .. وخليكو فرحانين
العملية من الاول محسومة .. لأحد المرشحين
ولا عايزين تقنعونى انكم بالنتيجة متفاجئين ؟؟
مقاطعتى خوف على بلدى ~ ورفض لظلم ملايين
ناس فى السجون من غير تهمة .. والمعتقلات والزنازين
وناس بتقع برصاص حى .. مصدره إيه .. مش عارفين!!
انا مش مقاطعة لوحدى .. فى غيرى كتير مقاطعين
واللجان أهى كانت فاضية .. يعنى كتير رافضين
واتهاماتكم ليا هرد عليها بالترتيب .. وخليكو فاكرين
~

الخيانة .. إننا ننسى شهداء خمسه وعشرين

والحرس و رابعة والنهضة .. وكل الميادين
ولا هم اللى ماتوا كانوا مش مصريين ؟!!
~

والإرهاب هو اللى يهدد بتغريم المقاطعين

ويستخدم المأذن لحشد المنتخبين
ولا هى الديمقراطية إننا نغصب ملايين ؟!!
~

والتخلف .. إننا نصدق إننا للخير رايحين

وننتخب واحد بيقتل ويعذب مصريين
ولا أنتو مصدقين بجد إننا نور العين ؟!!
~

والجنان .. إننا نفرح .. وأبو الشهيد بيبكى و حزين

ونرقص على باب اللجنة .. ونغنى ونطبل للفاسدين
ولا أنتو مش مدركين أنهم بس عايزين نسبة مشاركين ؟!!
~

والهمجية .. إننا نسمع لإعلام الكاذبين

ونقول نعم لدستور عملوه شوية راقصين

ونعدد شهداء الجيش و الشرطة وننكر اللى ماتوا محروقين

جيش مصر فوق راسى .. والشرطة جوه العين

لكن قتل شبابنا كان واضح .. وما ينكره إلا اللى قلوبهم عميانين
وإنى أنزل اشارك معناه .. دم اللى ماتوا راح فى الطين
~
والغيظ .. إننا ننزل عشان بس نكيد فى ناس تانيين
نسينا مصر خالص .. وكل همنا نكيد مين ونغيظ مين

~ ~ ~

انا مش زعلانه من اللى شارك .. لكن حزينة عليهم حُزن سنين
حزينة إننا انقسمنا .. ونسينا فى الأساس إحنا مين
نسينا قبل العروبة ومصر .. إن احنا أصلا مسلمين
ونسينا ان قوتنا فى وحدتنا .. وماينفعش نكون منقسمين
~
 إنك تشارك ده رأيك .. وانى اقاطع ليه عليّا متحاملين
وعلى فكرة ~ أنا مش إخوانى .. لكن الشهداء إخوانى والمعتقلين
وعيب نصور لجان انتخابية .. ونخبى مشهد ثوار فى الشوارع ماشيين
هدفهم وغايتهم واحدة .. وشعارهم مكملين ~ ~ مكملين
ثائرين ضد حكم العسكر .. اللى هتفنا يسقط يسقط من تلات سنين
ودلوقتى أهو بنهتف له مش ضده .. يعنى عكس ما كنا متفقين
جنان ده ولا زهايمر ... يا ناس عقولكم راحت فين ؟؟!!!!