السبت، 7 يناير، 2017

مأساة مراهقة


أسطر قليلة؛ كتبتها تعليقا على واقعة فتاة الصف الخامس اﻻبتدائى؛ التى ارسلت جواب حب لزميلها
~~~~~~~
ليه يا أمى الغالية تفضحينى بين الناس
هو انتى ماتعرفيش ان اناعندى إحساس
وقلبى لسه صغير برئ مرهف حساس
بيدق من غير إذنى وبيعشق بحماس
ومجرد ما بشوف شاب أرتبك و احتاس
****
وانت يا مجتمعى ليه شغال عليا هزار
وسخرية وتريقه وضحك ليل نهار
مش مفكر انى بكده ممكن جدا انهار
بجد خلاص زهقت وفكرت فى اﻻنتحار
****
غريب جدا موقفكم من مشكلتى واسلوبكم
ماكنتوش يوم فى سنى واتحركت مشاعركم!
وﻻ اتولدتوا كبار متحكمين بقلوبكم
خلاص كلكوا كاملين و ماشين كده بعقولكم
والله كدابين .. وكفاية صدعنى كلامكم
****
ليه ماحدش  منكم حاول يلاقى لى عذر
ضحكتوا بس عليا واتهمتونى ظلم و غدر
و أهو أهلى مش طايقنى~وبيتنا اتحول قبر
إزاى هقدر أواجههم~يارب ارزقنى الصبر
****
هو ذنبى انى مراهقه وﻻ ذنبى انى بنت
طب حتى ايه التهمة عشان تفضحونى عالنت
هو انا عشان حبيت اكون بكده أجرمت
****
طب اسمعونى بقى .. عايزة اقول كلمتين
اللى بجد اجرم انتو يا مجتمع جاهلين
مش فاهم ايه تربية وﻻ حتى يعرف دين
مش مدرك انى مراهقة زى كتير مراهقين
و وارد يحصل ميل وانجذاب بين الجنسين
ومن غير اى وعى بنقول ده حب سنين
ونطير لبعيد فى خيالنا وكأننا بجناحين
ساعتها بنحتاج منكم .. حضن و كلمتين
وياريت لو معاهم طبطبة و بوستين
بكل هدوء وحب فهمونا الغلط فين
عرفونا وعلمونا يعنى ايه حب مراهقين
ومن غير تريقه وﻻ ضحك كونوا منا قريبين

ليست هناك تعليقات: